الذاريات

قیامت پر قسمیں 1–6

Ayah 1

بکھیرنے والیوں کی قسم جو اُڑا کر بکھیر دیتی ہیں

Ayah 2

پھر (پانی کا) بوجھ اٹھاتی ہیں

Ayah 3

پھر آہستہ آہستہ چلتی ہیں

Ayah 4

پھر چیزیں تقسیم کرتی ہیں

Ayah 5

کہ جس چیز کا تم سے وعدہ کیا جاتا ہے وہ سچا ہے

Ayah 6

اور انصاف (کا دن) ضرور واقع ہوگا

قیامت کا مذاق اڑانے والے 7–14

Ayah 7

اور آسمان کی قسم جس میں رسے ہیں

Ayah 8

کہ (اے اہل مکہ) تم ایک متناقض بات میں (پڑے ہوئے) ہو

Ayah 9

اس سے وہی پھرتا ہے جو (خدا کی طرف سے) پھیرا جائے

Ayah 10

اٹکل دوڑانے والے ہلاک ہوں

Ayah 11

جو بےخبری میں بھولے ہوئے ہیں

Ayah 12

پوچھتے ہیں کہ جزا کا دن کب ہوگا؟

Ayah 13

اُس دن (ہوگا) جب ان کو آگ میں عذاب دیا جائے گا

Ayah 14

اب اپنی شرارت کا مزہ چکھو۔ یہ وہی ہے جس کے لئے تم جلدی مچایا کرتے تھے

متقین کی صفات 15–19

Ayah 15

بےشک پرہیزگار بہشتوں اور چشموں میں (عیش کر رہے) ہوں گے

Ayah 16

اور) جو جو (نعمتیں) ان کا پروردگار انہیں دیتا ہوگا ان کو لے رہے ہوں گے۔ بےشک وہ اس سے پہلے نیکیاں کرتے تھے

Ayah 17

رات کے تھوڑے سے حصے میں سوتے تھے

Ayah 18

اور اوقات سحر میں بخشش مانگا کرتے تھے

Ayah 19

اور ان کے مال میں مانگنے والے اور نہ مانگنے والے (دونوں) کا حق ہوتا تھا

زمین اور نفس میں نشانیاں 20–23

Ayah 20

اور یقین کرنے والوں کے لئے زمین میں (بہت سی) نشانیاں ہیں

Ayah 21

اور خود تمہارے نفوس میں تو کیا تم دیکھتے نہیں؟

Ayah 22

اور تمہارا رزق اور جس چیز کا تم سے وعدہ کیا جاتا ہے آسمان میں ہے

Ayah 23

تو آسمانوں اور زمین کے مالک کی قسم! یہ (اسی طرح) قابل یقین ہے جس طرح تم بات کرتے ہو

ابراہیم کے پاس فرشتوں کی آمد 24–30

Ayah 24

بھلا تمہارے پاس ابراہیمؑ کے معزز مہمانوں کی خبر پہنچی ہے؟

Ayah 25

جب وہ ان کے پاس آئے تو سلام کہا۔ انہوں نے بھی (جواب میں) سلام کہا (دیکھا تو) ایسے لوگ کہ نہ جان نہ پہچان

Ayah 26

تو اپنے گھر جا کر ایک (بھنا ہوا) موٹا بچھڑا لائے

Ayah 27

(اور کھانے کے لئے) ان کے آگے رکھ دیا۔ کہنے لگے کہ آپ تناول کیوں نہیں کرتے؟

Ayah 28

اور دل میں ان سے خوف معلوم کیا۔ (انہوں نے) کہا کہ خوف نہ کیجیئے۔ اور ان کو ایک دانشمند لڑکے کی بشارت بھی سنائی

Ayah 29

تو ابراہیمؑ کی بیوی چلاّتی آئی اور اپنا منہ پیٹ کر کہنے لگی کہ (اے ہے ایک تو) بڑھیا اور (دوسرے) بانجھ

Ayah 30

(انہوں نے) کہا (ہاں) تمہارے پروردگار نے یوں ہی فرمایا ہے۔ وہ بےشک صاحبِ حکمت (اور) خبردار ہے

قومِ لوط کی ہلاکت 31–37

Ayah 31

ابراہیمؑ نے کہا کہ فرشتو! تمہارا مدعا کیا ہے؟

Ayah 32

انہوں نے کہا کہ ہم گنہگار لوگوں کی طرف بھیجے گئے ہیں

Ayah 33

تاکہ ان پر کھنگر برسائیں

Ayah 34

جن پر حد سے بڑھ جانے والوں کے لئے تمہارے پروردگار کے ہاں سے نشان کردیئے گئے ہیں

Ayah 35

تو وہاں جتنے مومن تھے ان کو ہم نے نکال لیا

Ayah 36

اور اس میں ایک گھر کے سوا مسلمانوں کا کوئی گھر نہ پایا

Ayah 37

اور جو لوگ عذاب الیم سے ڈرتے ہیں ان کے لئے وہاں نشانی چھوڑ دی

گزری قوموں میں نشانیاں 38–46

Ayah 38

اور موسیٰ (کے حال) میں (بھی نشانی ہے) جب ہم نے ان کو فرعون کی طرف کھلا ہوا معجزہ دے کر بھیجا

Ayah 39

تو اس نے اپنی جماعت (کے گھمنڈ) پر منہ موڑ لیا اور کہنے لگا یہ تو جادوگر ہے یا دیوانہ

Ayah 40

تو ہم نے اس کو اور اس کے لشکروں کو پکڑ لیا اور ان کو دریا میں پھینک دیا اور وہ کام ہی قابل ملامت کرتا تھا

Ayah 41

اور عاد (کی قوم کے حال) میں بھی (نشانی ہے) جب ہم نے ان پر نامبارک ہوا چلائی

Ayah 42

وہ جس چیز پر چلتی اس کو ریزہ ریزہ کئے بغیر نہ چھوڑتی

Ayah 43

اور (قوم) ثمود (کے حال) میں (نشانی ہے) جب ان سے کہا گیا کہ ایک وقت تک فائدہ اٹھالو

Ayah 44

تو انہوں نے اپنے پروردگار کے حکم سے سرکشی کی۔ سو ان کو کڑک نے آ پکڑا اور وہ دیکھ رہے تھے

Ayah 45

پھر وہ نہ تو اُٹھنے کی طاقت رکھتے تھے اور نہ مقابلہ ہی کرسکتے تھے

Ayah 46

اور اس سے پہلے (ہم) نوح کی قوم کو (ہلاک کرچکے تھے) بےشک وہ نافرمان لوگ تھے

تخلیق کی نشانیاں اور اللہ کی طرف رجوع 47–51

Ayah 47

اور آسمانوں کو ہم ہی نے ہاتھوں سے بنایا اور ہم کو سب مقدور ہے

Ayah 48

اور زمین کو ہم ہی نے بچھایا تو (دیکھو) ہم کیا خوب بچھانے والے ہیں

Ayah 49

اور ہر چیز کی ہم نے دو قسمیں بنائیں تاکہ تم نصیحت پکڑو

Ayah 50

تو تم لوگ خدا کی طرف بھاگ چلو میں اس کی طرف سے تم کو صریح رستہ بتانے والا ہوں

Ayah 51

اور خدا کے ساتھ کسی اَور کو معبود نہ بناؤ۔ میں اس کی طرف سے تم کو صریح رستہ بتانے والا ہوں

نبی کے لیے تسلی 52–55

Ayah 52

اسی طرح ان سے پہلے لوگوں کے پاس جو پیغمبر آتا وہ اس کو جادوگر یا دیوانہ کہتے

Ayah 53

کیا یہ کہ ایک دوسرے کو اسی بات کی وصیت کرتے آئے ہیں بلکہ یہ شریر لوگ ہیں

Ayah 54

تو ان سے اعراض کرو۔ تم کو (ہماری) طرف سے ملامت نہ ہوگی

Ayah 55

اور نصیحت کرتے رہو کہ نصیحت مومنوں کو نفع دیتی ہے

جن و انس کی تخلیق کا مقصد 56–60

Ayah 56

اور میں نے جنوں اور انسانوں کو اس لئے پیدا کیا ہے کہ میری عبادت کریں

Ayah 57

میں ان سے طالب رزق نہیں اور نہ یہ چاہتا ہوں کہ مجھے (کھانا) کھلائیں

Ayah 58

خدا ہی تو رزق دینے والا زور آور اور مضبوط ہے

Ayah 59

کچھ شک نہیں کہ ان ظالموں کے لئے بھی (عذاب کی) نوبت مقرر ہے جس طرح ان کے ساتھیوں کی نوبت تھی تو ان کو مجھ سے (عذاب) جلدی نہیں طلب کرنا چاہیئے

Ayah 60

جس دن کا ان کافروں سے وعدہ کیا جاتا ہے اس سے ان کے لئے خرابی ہے